શ્રી હરિ સ્તોત્રમ્ (જગજ્જાલપાલમ્)

જગજ્જાલપાલં કનત્કંઠમાલં
શરચ્ચંદ્રફાલં મહાદૈત્યકાલમ્ ।
નભોનીલકાયં દુરાવારમાયં
સુપદ્માસહાયં ભજેઽહં ભજેઽહમ્ ॥ 1 ॥

સદાંભોધિવાસં ગલત્પુષ્પહાસં
જગત્સન્નિવાસં શતાદિત્યભાસમ્ ।
ગદાચક્રશસ્ત્રં લસત્પીતવસ્ત્રં
હસચ્ચારુવક્ત્રં ભજેઽહં ભજેઽહમ્ ॥ 2 ॥

રમાકંઠહારં શ્રુતિવ્રાતસારં
જલાંતર્વિહારં ધરાભારહારમ્ ।
ચિદાનંદરૂપં મનોજ્ઞસ્વરૂપં
ધૃતાનેકરૂપં ભજેઽહં ભજેઽહમ્ ॥ 3 ॥

જરાજન્મહીનં પરાનંદપીનં
સમાધાનલીનં સદૈવાનવીનમ્ ।
જગજ્જન્મહેતું સુરાનીકકેતું
ત્રિલોકૈકસેતું ભજેઽહં ભજેઽહમ્ ॥ 4 ॥

કૃતામ્નાયગાનં ખગાધીશયાનં
વિમુક્તેર્નિદાનં હરારાતિમાનમ્ ।
સ્વભક્તાનુકૂલં જગદ્વૃક્ષમૂલં
નિરસ્તાર્તશૂલં ભજેઽહં ભજેઽહમ્ ॥ 5 ॥

સમસ્તામરેશં દ્વિરેફાભકેશં
જગદ્બિંબલેશં હૃદાકાશવેશમ્ ।
સદા દિવ્યદેહં વિમુક્તાખિલેહં
સુવૈકુંઠગેહં ભજેઽહં ભજેઽહમ્ ॥ 6 ॥

સુરાલીબલિષ્ઠં ત્રિલોકીવરિષ્ઠં
ગુરૂણાં ગરિષ્ઠં સ્વરૂપૈકનિષ્ઠમ્ ।
સદા યુદ્ધધીરં મહાવીરવીરં
ભવાંભોધિતીરં ભજેઽહં ભજેઽહમ્ ॥ 7 ॥

રમાવામભાગં તલાલગ્નનાગં
કૃતાધીનયાગં ગતારાગરાગમ્ ।
મુનીંદ્રૈસ્સુગીતં સુરૈસ્સંપરીતં
ગુણૌઘૈરતીતં ભજેઽહં ભજેઽહમ્ ॥ 8 ॥

ફલશ્રુતિ ।
ઇદં યસ્તુ નિત્યં સમાધાય ચિત્તં
પઠેદષ્ટકં કંઠહારં મુરારેઃ ।
સ વિષ્ણોર્વિશોકં ધ્રુવં યાતિ લોકં
જરાજન્મશોકં પુનર્વિંદતે નો ॥ 9 ॥

ઇતિ શ્રી પરમહંસસ્વામિ બ્રહ્માનંદવિરચિતં શ્રીહરિસ્તોત્રમ્ ॥

શ્રી હરિ સ્તોત્રમ્ (જગજ્જાલપાલમ્) – Shri Hari Stotram – jagaj jalapaalan kanakantha malam in gujarati